HIZI HAPA HABARI ZA KIMATAIFA UNAWEZA KUPITIA

Julius Malema

APRIL 04/2016

RWANDA

Mshukiwa wa mauaji ya kimbari nchini Rwanda Ladislas Ntaganzwa amefikishwa kwa mara ya kwanza mbele ya mahakama mjini Kigali wiki mbili baada ya kukabidhiwa Rwanda toka Jamuhuri ya Kidemokrasia ya Congo.

Mtuhumiwa huyo hakujibu maswali yote aliyoulizwa na jaji.

Anashtakiwa kuhusika katika mauaji ya kimbari na ubakaji alipokuwa mkuu wa wilaya ya Nyakizu kusini mwa Rwanda mwaka 1994.

Bw Ntaganzwa amefikishwa mahakamani chini ya ulinzi mkali wa askari polisi pia kukiwa na watu wengi waliokuja kuhudhuria kesi wakiwa ni manusura wa mauaji ya kimbari kutoka wilaya ya Nyakizu.

Mwendesha mashtaka amemfunguliwa mashtaka matano yakiwemo mauaji ya kimbari, kuhamasisha genge la Wahutu kutekeleza mauaji hayo na ubakaji.

Ameiambia mahakama kuwa mtuhumiwa alitekeleza makosa hayo katika sehemu mbali mbali za wilaya ya Nyakizu, kusini mwa Rwanda.

Alipoulizwa kuhusu hoja ya mwendesha mashtaka, mshtakiwa ameamua kukaa kimya na hakutoa jibu lolote.

Wakili wake amesema kuwa hana lolote ya kuiambia mahakama hii ya mwanzo akisisitiza haina mamlaka ya kuendesha kesi hiyo.

Kesi dhidi ya Bw Ntaganzwa, sawa na za watuhumiwa wengine wa mauaji ya kimbari waliokuwa wanasakwa na mahakama ya kimataifa kwa ajili ya Rwanda ICTR, inasikizwa na kitengo maalumu cha mahakama kuu nchini Rwanda baada ya kufungwa kwa ICTR mwishoni mwa mwaka jana.

Jaji alisema kesi ilioanza leo ni ya mwanzo na kusudi lake ni kutafuta kifungo cha muda kabla ya kesi yenyewe kuanza kusikilizwa kwa undani wake.

Bw Ntaganzwa alikabidhiwa Rwanda wiki mbili zilizopita kutoka DR Congo.

&&&&&&&&&&&&&&&&&&&&&&&&&&&&&&&&&&&&&&&&&&&&&&&

TECHNOLOGY KUHUSU KUNDI LA TALIBAN

Programu inayotumiwa katika simu za Android Alemarah, iliyoundwa na kundi la wapiganaji wa Taliban imeondolewa kwenye soko la programu la Google, Play Store.

App hiyo iliyozinduliwa tarehe 1 April, miongoni mwa mengine, ilikuwa na taarifa rasmi na video kutoka kwa kundi hilo la Kiislamu kwa lugha ya Pashto.

Kundi hilo limesema kumetokea “hitilafu za kiufundi” baada ya app hiyo kutoweka.

Hata hivyo imefahamika kwamba app hiyo imeondolewa kwa sababu inakiuka kanuni na sera za Google zinazokataa uchochezi.

App hiyo iligunduliwa na shirika la Marekani la Site Intel Group linalofuatilia shughuli za makundi ya kijihadi.

Google imekataa kuzungumzia app hiyo binafsi lakini ikasema kupitia taarifa kuwa: “Sera zetu zimeundwa kuridhisha wateja wetu na watu wanaotengeneza app. Ndio maana huwa twatoa apps zinazokiuka sera hizi kutoka kwenye Google Play."

Msemaji wa kundi la Taliban alikuwa ameambia Bloomberg kwamba app hiyo ilikuwa “sehemu ya juhudi za kiteknolojia za kufikia watu zaidi duniani.”

 &&&&&&&&&&&&&&&&&&&&&&&&&&&&&&&&&&&&&&&&&&&&&&&&&&

SENEGAL

Senegal imekubali kuwapokea wafungwa wawili wa Guantanamo Bay kwa misingi ya kibinadamu .

Serikali ya taifa hilo la Magharibi mwa Afrika inasema kuwa kutokana na mafunzo ya dini ya kiislamu wamekubalika kuwapokea walibya hao 2 kwa mujibu wa waziri wa maswala ya kigeni wa nchi hiyo.

Wafungwa hao 2 walikuwa wanatumikia kifungo cha miaka 14 jela bila kufunguliwa mashtaka yeyote.

Kauli hiyo inafuatia uamuzi wa serikali ya rais Barack Obama ya kufunga jela hiyo ya kisiwa cha Guantanamo Bay.

Rais huyo wa Marekani aliahidi kufunga kituo hicho miaka 7 iliyopita.

Mataifa machache yamekubali kuwapokea wafungwa wa Guantanamo Bay yakiwemo baadhi ya mataifa ya kiafrika kama Uganda, Ghana na Cape Verde.

&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&

NIGERIA

Waziri wa Mafuta wa Nigeria ameomba radhi wa taifa zima baada ya ukosefu wa mafuta kusababisha maelfu ya wasafiri kukwama mabarabarani wakati wa sikukuu ya pasaka.

Waziri Emmanuel Ibe Kachikwu ameelezea ''uchungu'' uliosababishwa na upungufu huo wa mafuta ya magari.

Bw Kachikwu ameahidi kumaliza kabisa upungufu wa aina hiyo kote nchini.

Aidha amesema kuwa serikali inafanya kila jitihada kuhakikisha kuwepo kwa mafuta nchini humo.

Katika majuma kadhaa yaliyopita foleni ndefu ya magari pikipiki na hata lori imeshuhudiwa kwenye vituo vya kuuzia bidhaa hiyo adimu.

Wenye magari wanasema kuwa wakati mwengine wanalazimika kupiga foleni kwa masaa mengi mno .

Wengi wanajiuliza itakuwaje kuwa Nigeria ndilo taifa linalozalisha idadi kubwa zaidi ya mafuta barani Afrika ilhali hata nyumbani hawana mafuta ya magari?

Wasilolijua ni kuwa Nigeria haina mtambo wa kusafisha mafuta na hivyo lazima iagize kutoka nje mafuta ya matumizi yake ya nyumbani.

Wauzaji mafuta wanasema kuwa kuna utashi mkubwa wa dola za Marekani wanazohitaji kununua mafuta.

Lakini kuna madereva wanaoshuku utashi huo wakidai kuwa huenda ni njama ya wauzaji mafuta kuongeza bei ya bidhaa hiyo

 &&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&

AFRIKA KUSIN

Maafisa wa polisi Afrika Kusini walimvizia kiongozi wa chama cha upinzani cha Economic Freedom Fighters (EFF) Julius Malema katika barabara moja ya Johannesburg jana usiku katika tukio ambalo kiongozi huyo anadai linalenga kumtishia ili alegeze kamba dhidi ya rais Jacob Zuma.

Kupitia kwa mtandao wa kijamii wa Twitter chama chake cha EFF kinasema kuwa Kamanda wao aliviziwa na polis ambapo takriban magari kumi ya polisi ambao wote walimelekezea mtutu wa bunduki baada ya kulizuia gari lake katika makutano ya barabara ya Grayston .

Taarifa hiyo inasema kuwa hali hiyo inaonesha wazi kuwa serikali ambayo sasa imekabwa koo na tuhuma za matumizi mabaya ya madaraka na ubadhirifu wa mali ya umma imeanza kutumia mbinu hiyo na kutumia nguvu kinyume cha sheria.

Msemaji wa polisi amesema kuwa hakufahamu lolote kuhusu tukio hilo.

EFF na bwana Malema wanaongoza kampeini ya kumng'oa rais Zuma madarakani kufuatia utepetevu na ubadhirifu wa mali ya umma.

Chama hicho kilipata uungwaji mkono juma lililopita mahakama ya juu zaidi nchini humo ilipompata Zuma na hatia ya matumizi mabaya ya madaraka yake na ubadhirifu wa fedha kuhusiana na ukarabati wa makazi yake ya Nkandla.

Zuma akekanusha kufanya makosa yeyote ila amekubali kurejesha fedha zilizotumika katika ukarabati huo ilokiuka sheria za nchi.